سامح حسين: لما تقول سرك لحد افتكر إنك شخصيًا مقدرتش تحافظ عليه
قال الفنان سامح حسين: "لما تفكر تقول سرك لحد، ابقى افتكر كويس إنك إنت شخصيًا وإنت صاحب السر ما قدرتش تكتمه، فما بالك باللي هتعطي له سرك".
وأضاف سامح حسين خلال تقديمه برنامج "قطايف" المذاع عبر قناة الحياة:ى"لو سألتني إيه أكتر الإفيهات اللي ضحكت عليها في حياتك، هقولك يا سلام على الأسئلة اللي تفتح النفس دي، وأرد عليك بأنه إفيه لعم حسن حسني الله يرحمه في فيلم "الباشا تلميذ" لما كانت مراته مدام ألفت سكر الله يرحمها، وكانت قاعد قدام التسريحة بتتزوق، فهو قالها "كفاية بقى يا حبيبتي.. هو أنا غريب؟!" فطبعا الضحك ده شيء نسبي، واللي يضحكك ممكن ما يضحكش غيرك، لكن جمال الإفيه ده تحديدًا جاي من عبثيته، من لا منطقيته " يعني إيه أنا جوزك مش حد غريب".
وتابع: "عارف بقى الجملة اللي بنعتبرها نكتة وبنضحك عليها، ناس كتير أوي بتتعامل بها في حياتها عادي، ومش واخدة بالها إنها ماشية في الشارع بإفيه، زي" وفيها إيه يعني أنا جوزك مش حد غريب، وفيها إيه يعني أنا مراتك مش حد غريب، وكأن العلاقة اللي ما بيننا لما تكون على مستوى عالي من القرب تسقط معها الحقوق والواجبات، وكأن الانسان ليس ملزم بمنظومة حقوق تجاه كل الناس، حتى تجاه نفسه، وبناء عليها فيه حاجات ينفع تحصل وحجات مينفش تحصل.. فما بالك بمراتك؟! وما بالك بزوجك؟".
