قصة زواج عمرو سلامة ومروة البرماوي: تعارفا بسبب كورونا واستأذنت بنتيها لإتمام الارتباط

في لفتة رومانسية، احتفل المخرج عمرو سلامة بعيد ميلاد زوجته مروة البرماوي، موجهًا إليها رسالة حملت كلمات من الحب والتقدير وقال عبر حسابه على «فيسبوك»: «كل سنة وإنتِ في بهجة وصحبة ومعنى حياة كل سنة وإنتِ بتصغري وبتحلوي وروحك أخف وقلبك أكثر بياضًا، كل سنة وإنتِ أشطر وأنجح وأكبر طموحًا».

بداية التعارف

روت «مروة» عن بداية تعارفها علي «عمرو»: «أنا كنت عاملة مسلسل وعمرو كان شايف المسلسل وكان شريك فيه من بعيد لحد ما بعد ما المسلسل اتعرض وخلص لقيته باعتلي رسالة على السوشيال ميديا بيشكر في الشغل».

ونوهت: «كان وقت الكورونا وأنا كنت محبوسة في السعودية بسبب غلق المجال الجوي، فاضطريت أقعد فترة، وهناك بدأنا نتكلم أكتر، ومع الوقت الحوار فتح بشكل أكبر.. ومن وجهة نظري كنت حاسة إن الموضوع جاي بالصدفة، لكن اكتشفت بعدين إن وراه تفاصيل أكتر من مجرد صدفة من ناحية عمرو».

حكى «سلامة» من وجهة نظره: «أنا دخلت وقلت لها شغلك عجبني فعلاً، وهي كانت شكلها لطيف، فالاتنين مع بعض خلوني أبدأ الكلام بشكل طبيعي»، وكان شعور «مروة» وقتها خليطًا من الارتياح والحذر في آنٍ واحد حسب وصفها.

كانت «مروة» في تلك المرحلة قد سبق لها الزواج، ولديها ابنتان، وكانت تخوض تجربة الأمومة بالفعل وقت تعرفها على عمرو.

مصارحة بناتها عن عمرو

عن طريقة تعريف بناتها بعلاقتها الجديدة، أوضحت: «أنا دايمًا أنا والبنات كنت بعملهم إنهم أصحابي، أمي كانت بتعمل معايا كده وأنا بعمل معاهم كده، فقعدت معاهم وشرحت لهم إن في حد في حياتي وكنت أنا اللي مترددة مش هم، ومش عارفة أقول إيه وأدخل الموضوع إزاي.. كنت بكلمهم واحدة واحدة، وبدأنا نتعود إن في تواصل، يعني أكلم عمرو في التليفون ويقول لهم هاي، ونتقابل ونتعرف أكتر».

رد فعل بناتها

أضافت عن موقف أطفالها بعد علاقتها من «عمرو»: «بنتي الصغيرة كانت مترددة شوية وكانت ماسكة فيا قوي، وخايفة إن حد ياخد مني حاجة.. عمرو كان متعاون جدًا وكنت بحاول أقول له إيه اللي يساعدهم، يعني مين محتاج هدوء أكتر، ومين اجتماعي أكتر، فكان بيتعامل على الأساس ده».

وتطرق «سلامة» للحديث عن طبيعة اختياراتها: «أنا مكنش عندي فكرة إن لازم يبقى في مواصفات معينة أو شروط مسبقة، زي إنه تكون متجوزه قبل كده أو لأ.. الموضوع ما كانش بالشكل ده عندي.. أنا ومروة أول ما تقابلنا حصل ارتياح سريع جدًا، كأن في مساحة مشتركة اتفتحت بينا من أول لحظة».

عرض الزواج

استرجع «سلامة» بداية النقاش حول فكرة الارتباط: «هي قالت لي: إنت فاهم يعني إيه عندي طفلين؟ وبعدين كررت السؤال كذا مرة كأنها عايزة تتأكد إن الصورة واضحة قدامي تمامًا.. وأنا كنت بقول نفس الجملة اللي بقولها طول عمري هنكتشف… هنكتشف مع بعض في الرحلة دي شكل الحياة هتمشي إزاي».

وتابع: «اتكلمنا في كل التفاصيل قبل الجواز حتى الحاجات اللي الناس ممكن تشوفها تقيلة أو مش مهمة كنا فاتحين كل الملفات بصراحة وده خلّى بداية الحياة بينا تكون أوضح وأسهل بكتير».

الزواج

وصف شخصية «مروة»: «من الأول كانت ذكية جدًا في قراءة العلاقات، بتفهم الديناميكية بين الناس، وبتعرف توازن الأمور قبل ما تحصل أي مشاكل.. وده خلى العلاقة تمشي بهدوء لأنها كانت حاسة بكل حاجة بتحصل حوالينا لو في ضغط لو في توتر، أو لو البنات محتاجين مساحة أمان أكتر».

وحكي عمرو عن محاولة قربه من بنات زوجته: «مكنش عندي حسبة إن هتجوز واحدة متزوجه قبل كده.. قضيت سنين بحاول أتعلم إزاي أتعامل مع الموضوع ده والعِشرة مع الأطفال بتخليك تفهم حاجات كتير جدًا وتخليك أهدى في التعامل وبقيت عارفة أدي كل واحد مفتاحه بطريقة تناسبه».