منى عبد الغني باكية على الهواء: بنموت كل يوم بسبب صور أطفال غزة وبأي ذنب يتكفنوا |فيديو

دخلت الإعلامية منى عبد الغني في نوبة بكاء على الهواء خلال تقديمها برنامجها الستات مايعرفوش يكدبوا، مشيرة إلى أن ما يحدث من جرائم ما ذنب أطفال غزة منه.

وانهارت منى عبد الغني من البكاء على الهواء مباشرة، وذلك خلال تقديم حلقتها من برنامج الستات مايعرفوش يكدبوا، قائلة: أنا النهاردة عندي رسالة مش بتوصف حالي بس لكن رسالتي بتعبر عن ناس بنشوفها بقالنا كذا يوم بتتألم، بأي ذنب طفل عنده شهور يتكفن بالكفن وأطفال مجروحة جروح إحنا منقدرش نستحملها.

وأضافت منى عبد الغني: بنشوف فيديوهات لأمهات بتودع أطفالها بكل ثبات ويقين وهي صابرة ومنقدرش نقول غير حسبي الله ونعم الوكيل، وبشوف صور الأطفال دي وبتخيل أحفادي.. وبقعد اتخيل لو مكان الأم دي هما بجد أقوى مننا.

واستكملت منى حديثها: الشعب ده قوي ومؤمن وده تصديقا لقول الله وإحنا بنموت مع كل صورة من دول وكل فيديو بشوفه ببقى عايزة أخد الأطفال دي في حضني واطبطب عليهم.. طفل رضيع المفروض ميكنش بيعمل حاجة في حياته غير أنه بيلعب الطفل ده كل ذنبه أنه اتولد في دولة محتلة معندهاش لا رحمة ولا دين.

منى عبد الغني: لازم نراعي مشاعرهم هما بيموتوا كل يوم

وأوضحت منى: خلينا نحاول نعيش ومنيأسش من رحمة ربنا وأكيد ربنا ليه حكمة في كده - إشارة إلى ما يحدث في غزة- وكل السيناريو ده مذكور في القرآن، أحداث بتخلي الواحد قلبه يتوجع كل ده هيخلص وهننتصر بإذن الله.

واختتمت حديثها: من حقكم تعيشوا حياتكم بس لازم نراعي مشاعر الناس اللي عايشين في صمت وبيتألموا وبيموتوا كل يوم والتاني.. وخلينا نفرح ونعمل أفراح وأعياد ميلاد بس من غير هيصه ومن غير ما نجرح ونراعي أخواتنا اللي بتموت طول الوقت، لأن إحنا اتعلمنا من زمان لما يبقى في عزاء عند جارنا مينفعش نعمل فرح، ربنا يردلنا فلسطين والمسجد الأقصى ردًا جميلًا وإحنا معاكم بقلوبكم.