” الدهب زينة وخزينة ”
الستات اتخلقوا علشان يلبسوا الدهب، ويكنزوه…
والرجالة اتخلقوا,, علشان يشتروا الدهب للستات ليلبسوه.
تفتكروا الرجالة بتحب الدهب؟ ولا اتخنقت منه؟
من الآخر، حنتكلم عن اللي في قلب الراجل واللي في قلب الست…
وعلى رأي المثل القديم والجديد: الدهب زينة وخزينة. ..
الست تشوف دهب تفرح…
تشوف تخفيضات الدهب تطير…
تشوف جوزها داخل المحل… تدعيله
مش مهم الوزن ولا العيار… المهم اللمعة اللي تخلي الست تحس إنها بتلمع وفي امان من غدر الزمان .
زمان… الست تروح تشتري حلق بـ 20 جنيه… وترجع تقول لجوزها:
“أهو حاجة كده تتشال للزمن ،،
والراجل يبتسم وهو جوّاه بيغني "الحياة حلوة".
دلوقتي… الست تدخل المحل تقول:
“عايزة حلق بسيط… خفيف…”
يقول لها: “تمام… 9 آلاف بس!”
والراجل يقف وراها يعمل نفسه بيتفرج… بس هو في الحقيقة ،بيعيط علي فلوسه
زمان؟ دهب أصفر وبس…
دلوقتي؟ دهب أصفر، أبيض، روز، نصه أبيض ونصّه زهري…
الست تدخل تقول: “عايزة حاجة شيك… بس خفيفه بسيطة…”
والراجل واقف بيترجم للصايغ:
“يعني حاجة تلمع… بس خفيفه ” سمعني
حتكلم عن العرايس في مصر… كل منطقة وليها عادات وتقاليد في الشبكه
القاهرة، عروسة لابسة 3 غوايش، و2 حلق، و3 خواتم… ،والام بتظغرط والكل مبسوط، والعريس واقف وراهاعامل فيها بيشرب بيبسي ومش قادر يبلع
وفي الصعيد: العروسة واهلها بتتشرط “أنا عايزة حاجة تقيلة تحسها فيها المهر…” والعريس بيعمل نفسه جامد … بس قلبه بيدق أسرع من موتر عربيه نقل تقيل
اما الإسكندرنيه العروسة ،،مشيها علي البحر غيه ،،لابسة طقم الدهب بيلمع وشياكه والعريس فرحان ،،وبيكلم نفسه : “أهو حلو… بس كام ”
ولاد البلد الجدعان بيفرحوا لما ستاتهم بتكون راضيه ومبسوطه ....
الدهب طبعًا ليه قيمته وفوايده… مش بس للزينه، كمان استثماره دلوقتي مهم لأي ظرف…
بيعمل أمان للست وللبيت، ومهما الزمن اتغير، الدهب دايمًا له قيمته ومكانته… وبيفضل رمز للفرحة والجمال.
وفي النهاية… نصيحتي : العروسة وأهل العروسة ميطلبوش من العريس شبكة كبيرة ولا دهب كتير… خلي الموضوع بسيط على القلب والجيب… كده الشباب يقدروا يتجوزوا بسهوله، والفرحة تكمّل… عشان الست تكون مبسوطة، والعريس يقدر يعيش ويفتح بيت ويجيب ولاد والتلاجه تكون مليانه لحمه وفراخ وخيرات ربنا من غير ما نستلف ولا نتخانق ولا يتضايق حد،،ولا نزعل مننا حد
ومن الآخر، ،،
علشان نجوز ولادنا ،نراعي بعضنا ،وياريت مندقش علي التفاصيل ال تقصم ضهر العريس وكفايه القوانين ال اخدتها الست لحقوقها ،،،،
الستات تقدر تقرر لنفسها ،،والدنيا اتغيرت الست ،،، بتختار ،وتبيع ،وتشتري، وتنزل شغلها ،،وتعيش حياتها بحريه واحترام ،،
والدهب مهم ،،لكن كرمتها وحريتها اهم بكتير من الدهب ،،،
