«لبستها كيس بلاستيك عشان أسحب الـ 6 غوايش».. اعترافات مستأجر المنيب وزوجته بإنهاء حياة «صاحبة العقار» لسرقة ذهبها

حصلت على نص تحقيقات نيابة جنوب الجيزة، بإشراف المستشار أسامة أبو الخير، المحامى العام الأول، فى واقعة مقتل «الحاجة محروسة» مالكة عقار المنيب، إذ كشفت التحقيقات عن جريمة غدر بطلها بائع ملابس وزوجته، استأجرا شقة لدى المجنى عليها وقررا إنهاء حياتها أمام طفلتهما الرضيعة لسرقة مصوغاتها الذهبية (6 غوايش، وسلسلة، وحلق) ومبلغ مالى.

نص اعترافات المتهم بقتل صاحبة عقار المنيب

واعترف المتهم الأول (محمد. أ)، 23 عامًا، بتفاصيل اللحظات الأخيرة قائلاً إنه هددها بعبارة: «هتدينا بمزاجك ولا ناخد غصب عنك؟»، قبل أن يقوم بخنقها بيديه ثم باستخدام «طرحة» طوق بها عنقها حتى لفظت أنفاسها الأخيرة، بينما قامت زوجته المتهمة الثانية (مريم. أ)، 21 عاماً، بشل حركة الضحية ومنعها من المقاومة، وأقر المتهمان فى التحقيقات بأنهما استخدما «كيسًا بلاستيكيًا» لتسهيل سحب الغوايش من يد الضحية عقب وفاتها، ثم فرا هاربين قبل أن تنجح أجهزة الأمن فى ضبطهما وإحالتهما للمحاكمة الجنائية.

وبمواجهة المتهم الأول بما نسب إليه، أدلى باعترافات تفصيلية أمام النيابة، حيث قال: « كنا فى البيت بتاعنا حوالى الساعة 10:00 صباحًا وفضلنا فى الشقة شوية و(مريم) نزلت جابت فطار بعد كده طلعت وفطرنا وبعدين ريحنا شوية على السرير وبعدين أنا قلت لـ(مريم) إحنا هنفذ اللى اتفقنا عليه دلوقتى وقلتلها انزلى للحاجة وشوفى الدنيا فى حد عندها ولا لأ».

وأضاف المتهم فى اعترافاته: «(مريم) نزلت وبعد ما (مريم) تأكدت إن مفيش حد وابنها (أحمد) اللى ساكن أمامنا نزل، وكانت حوالى الساعة 3:30 مساءً، فـ(مريم) أخذت التليفون بتاع الست (محروسة)، وبعتت ليا رسالة مضمونها (تعالى بسرعة) ورسالة ثانية بعدها بشوية (مفيش حد انزل)، وبعدها بعثت ليا (كلمنى شكرًا) 3 مرات من تليفون الحاجة، فـرنيت عليها من تليفونى على تليفون الحاجة وردت عليا، قالت لى انزل مفيش حد عند الحاجة فـنزلت وبعدين الباب الخشب كان مفتوح والسلك كان مردود فـالحاجة قالت لى ادخل ودخلت وكان بنتى معايا وقعدت على الكنبة سلمت على الحاجة واتكلمت فى كلام عادي».

تفاصيل مقتل الحاجة محروسة على يد مستأجر وزوجته

وتابع قائلاً: «بعد حوالى 5 دقايق قلت لها بقولك يا حاجة إحنا محتاجين فلوس نفك بيها زنقتنا وهنرجعهالك لما ربنا يفرجها، فهى ردت عليا قالت لى يا بنى والله أنا مش معايا، وقالت لى إن ابنها (أحمد) كان لسه عامل حادثة وخد منها 50 ألف جنيه عشان يعمل عملية فى ذراعه، فقلت لها طب بيعى حتة من الذهب بتاعك يا حاجة وادينا فلوسها وهنردهالك لما ربنا يفرجها، فهى ردت عليه قالت لى لأ طبعًا أنا معملتش كده مع ولادى واستلفت عشان ابنى يعمل عملية وأكيد مش هبيع دهبى عشان أى حد».

وعن لحظة تنفيذ الجريمة، قال المتهم: «رحت قايم من على الكنبة، ورحت ناحيتها بهدوء، ووطيت عليها وهى قاعدة على الكرسى وقلت لها (هتدينا حاجة بمزاجك ولا ناخذها غصب عنك) وكانت لسه هتصرخ رحت كاتم بوقها بإيديا وفى شال كان معايا رحت حاطه على بقها وهى حاولت تبعد إيدى عنها، فكان فيه طرحة على ذراع الكرسى اللى هى كانت قاعدة عليه، رحت واخد الطرحة دى بإيدى الثانية، ففضلت أخنقها بيها من رقبتها وأعصر فيها، لحد ما الحاجة الله يرحمها كان فيه كوباية على إيد الكنبة اللى أنا ومريم كنا قاعدين عليها، فكانت بتقاوم ومسكت الكوباية دى عشان تضربنى بيها وتدافع عن نفسها».

وأوضح المتهم دور شريكته قائلاً: «(مريم) لما لقتها خلاص هتضربنى بالكوباية راحت (مريم) جارية عليها ومسكت إيديها وفى الوقت ده الحاجة خربشت (مريم) فى وشها و(مريم) خدت منها الكوباية عشان متقاومش وعلشان أعرف أكمل إنى أموتها وبعدين شلت الطرحة من على بوقها ورحت لاففها حوالين رقبتها وفضلت أخنق فيها وأعصر فى رقبتها جامد فى البداية بس حاولت تصرخ لكن من بعد ما كتمت بوقها عشان هى ست كبيرة مقدرتش بعد كده تصرخ ومريم لما شافت المنظر كده خافت من اللى أنا شايفاه فخدت بنتى آيسل ودخلت غرفة نوم الأطفال لحد ما خلصت اللى بعمله».

سرقة 6 غوايش ذهب بـ «كيس بلاستيك» فى المنيب

واستطرد فى وصف لحظة السرقة: «بعدها بـ5 دقايق ندهت على مريم وقالت لها تعالى قلعيها الحلق اللى فى ودنها ومدت إيديها عشان تقلعها الحلق وفعلاً قلعتها الفردة اليمين عادى ولما جت تقلعها الفردة الشمال اتكسرت منها وبعد كده حاولنا نقلعها الغوايش معرفناش عشان الغوايش كانت ضيقة فـقالت لمريم استنى أنا هجيب كيس عشان نقلعها الغوايش ولبسناها الكيس فى إيدها اليمين اللى فيها الغوايش، وابتدينا نشد الغوايش أنا ومريم من إيدها لحد ما قلعناها الغوايش كلها وكانوا 6 غوايش».

وعن محاولة الهروب، قال: «بعدها قلت لـ(مريم) السلسلة بتاعتها اللى بتلبسها فى رقبتها مش موجودة ادخلى دورى عليها جوه فدورت فى الدولاب ملقتش حاجة بعد كده (مريم) خدت البنت ونزلت وأنا نزلت وراها وقابلتها فى الكنيسة وبعدها رحنا على الطالبية على محلات الذهب اللى عند العروبة وعثمان محرم عشان نبيع الذهب ونعرف نرجع على البلد علشان أنا مكنتش معايا فلوس ومحدش رضى ياخد الذهب عشان مش معانا فاتورة وبعد كده رحنا على الجيزة شارع الصاغة اللى جنب الميدان عشان نشوف حد ياخد مننا الذهب بس برضه محدش كان بيرضى عشان مش معانا فاتورة».

واختتم المتهم اعترافاته بقوله: «فمشينا ورحنا على المنيب وأنا حاولت أتصرف فى أى فلوس من أى حد تبعى عشان نعرف نسافر على سوهاج، عشان مكانش معانا أى فلوس خالص ساعتها، وبعدين اتصلت بأخويا وحجز لنا فى عربية رايحة على سوهاج، وقالى إننا لما نوصل على سوهاج أخويا هيحاسب السواق وفعلاً ركبنا عربية من على الدائرى بتاع المنيب حوالى الساعة 09:00 مساءً، وفعلاً لما جت العربية ركبنا واتحركت بينا على سوهاج وصلنا سوهاج حوالى الساعة 03:30 صباحًا ورحنا على البيت أبويا ودخلنا نمنا والشرطة بعدها جت مسكتنا وهو ده كل اللى حصل»