”شغل من البيت” هكذا تبدأ الحكاية.. نكشف أخطر شبكات النصب على الراغبين فى العمل من المنزل.

"شغل من البيت" هكذا تبدأ الحكاية، لكنها تنتهي غالبًا بخسارة المال وحظر مفاجئ من صفحات مجهولة، خلف هذه الإعلانات البسيطة، تكشف شهادات ضحايا وبيانات تحويلات مالية عن نمط متكرر يُرجّح وجود شبكة احتيال إلكتروني تستهدف الباحثين عن دخل إضافي عبر مواقع التواصل.في إحدى هذه الحالات، يروي أحد الضحايا كيف بدأت القصة بإعلان عابر على موقع فيسبوك لصفحة تحمل اسم باللغة الإنجليزية ، تعرض فرصة عمل من المنزل في تعبئة المشابك، يقول: أنا تواصلت مع الصفحة ، دي بتنزل إعلانات شغل إيه؟ مشابك، بالصدفة شفت إعلانها على الفيسبوك، بعتّ لهم رسالة، ردوا عليا تلقائي: إن ادخل على الموقع ده، وهات الكود اللي تحت في الموقع، ده كود الاشتراك بتاعك، دخلت على الموقع، لقيت الكود اللي تحت ده، أخدت الكود بعته لهم."

ويكمل: "الصفحة ردت عليَّ بعد كدة، قالوا لي التفاصيل بتاعة الشغل؛ إنك أنت بتحول 240 جنيه، 175 جنيه اشتراك، و75 جنيه اللي هي الشحن، ودي لمرة واحدة بس، لما هيجي لك الشغل المندوب هيسلمك الـ 175 جنيه، يعني أنت كل اللي هتدفعه الـ 75 دي مرة واحدة بس شحن."، رحت أنا بعتّ لهم الـ 240 جنيه دي عن طريق فودافون كاش من خلال محل. بعد كدة قالوا لي المندوب هيتواصل معاك وهيكون عندك الشغل بكرة مع العصر كدة، استنيت بكرة ييجي، محدش جِه، بعتّ لهم رسالة ومحدش رد عليا، وعلى وقت العشا كدة كانوا عاملين لي حظر (Block) من الصفحة."، "المشكلة هي الطريقة بتاعتهم، بمنتهى الذكاء؛ بيدخلوك موقع وتجيب الكود، وبعد كده بيقولوا لك التفاصيل كذا، بتصدق إن هي شركة حقيقية ويبعتوا لك ورق فيه السجل والبطاقة والمقر بتاعهم فين، ويقولك: 'تعالى لو أنت مش عايز تدفع مثلاً فلوس، تعالى المقر بتاع الشركة'.. وعرفت بعد كده إن المقر ده وهمي، مفيش مقر أساساً، فالناس بتصدق وتحول ليهم زي ما أنا حولت."

النمط يتكرر

لم تكن هذه الواقعة استثناءً.. في شهادة أخرى، يروي زوج إحدى الضحايا قصة مشابهة، لكن عبر صفحة مختلفة تحمل اسما ، حيث ظهرت نفس الفكرة تقريبًا: إن في صفحة اسمها يحمل معنى تكافلى دخلت المدام شافت بوست عنها وقالت إن هي بتقدم محتوى شغل من المنزل، تعبئة وتغليف، وبعتوا التفاصيل وبعتوا الكلام وقالوا في رسوم للشغل تأمين ولما المندوب يجي هيرد لكم التأمين ده، ولو عايزين تيجوا تقدموا في الشركة، وبعتت لنا اللي كلمتنا أو اللي كلمنا ده بطاقة "فيك" (مزيفة) باسم واحدة اسمها سلمى، دي بطاقة "فيك"، وبعت لنا ورق "فيك" برضه كسجل ومش عارف إيه وكذا وكذا، وقالوا لنا هتبعتوا 150 جنيه تأمين.

وبالفعل بعتنا الفلوس، واللي حصل بعدها فورًا ما بعتنا إن هم ما ردوش ولا تابعوا ولا أي حاجة.

فمن الوقت ده زي ما وضحت لحضرتك، من الوقت ده بقى، فالموضوع بصراحة لما اتحكى لي من زوجتي وكمان من بنت خالة زوجتي إن هي كلمتهم، نفس الناس بس من صفحة ليهم تانية، وحالياً في الحاجات اللي هبعتها لك هتعرف بالظبط إن هم نفس الأشخاص اللي بيديروا الصفحات، يعني هم عصابة واحدة بالظبط.
بعتت لهم أيضاً مبلغ 240 جنيه حولتهم على رقم خاص بيهم أيضاً من نفس المكان ونفس الأسرة ونفس كل حاجة ونفس الاسم. فاهمني؟ وبرضه من ساعتها عملوا بلوكات وكل حاجة، وبنرن عليهم واللي يقل أدبه واللي يشتم واللي كذا كذا وهكذا.

تجربة ميدانية: محرر اليوم السابع يقع في الفخ لاختبار الشبكة

لم يقتصر التحقيق على شهادات الضحايا فقط، بل امتد لاختبار عملي لكشف آلية النصب من الداخل، حيث خضتُ التجربة بنفسي عبر إنشاء حساب جديد على موقع "فيسبوك"، والتواصل مع إحدى الصفحات التي تروج لفرص "العمل من المنزل".

بدأت القصة بنفس السيناريو الذي رواه الضحايا؛ رد تلقائي سريع، ثم توجيه إلى موقع إلكتروني للحصول على "كود الاشتراك"، كما لاحظنا بعد ان ارسلنا من أكثر من أكونت "مزيف" أن الكود واحد لا يتغير بتغير الطلبات قبل أن تُرسل تفاصيل العمل المزعوم، والتي تضمنت دفع مبلغ مالي بسيط مقابل بدء العمل.

صورة من التجربة الشخصية

تطابق كامل يؤكد وجود شبكة منظمة

تكشف التجربة الشخصية أن ما يتعرض له الضحايا ليس حالات فردية، بل جزء من نمط احتيالي متكامل، يعتمد على تكرار نفس السيناريو عبر صفحات متعددة، مع تغيير الأسماء فقط، بينما تظل الآلية واحدة:
إغراء → رسوم بسيطة → طمأنة وهمية → اختفاء.
وهو ما يعزز فرضية وجود شبكة منظمة تدير هذه العمليات، مستفيدة من ضعف الوعي الرقمي وسهولة التحويلات المالية.