عمرو سلامة: الإعلانات في مصر أصبحت «نجم بيغني وبس» بعدما كانت تنافس عالميًا وتحصد أهم الجوائز

أعرب المخرج عمرو سلامة عن استيائه من تراجع مستوى الإعلانات التي تُقدم في مصر، موضحًا أن الحملات الإعلانية المصرية كانت تنافس عالميًا وتحصد أهم الجوائز في المسابقات، خلال فترة قريبة منذ 10 سنوات.

وكتب سلامة عبر «فيسبوك»: «الإعلانات في مصر من عشرة لـ خمستاشر سنة فاتوا كان فيها طفرة حقيقية، إيه اللى حصل حولها كلها لنجم بيغنى أغنية وبس، مع استثناءات قليلة جدا، الفترة اللى بتكلم عليها ديه من 2007 لـ 2015 كانت أفكار الإعلانات المصرية بتنافس عالميا، وكانت بتكسب أهم جوائز، وكانت حتى لو بسيطة ومن غير نجم بتعلم وتسيب أثر».

وأضاف: «مش عيب يبقى فى إعلان عبارة عن أغنية الناس تحفظها بوجود نجم الناس بتحبه علشان تسيب أثر، لكن ليه كله بقى كده، خصوصا إننا بنشوف الأغنية بتنجح وبتعيش والناس مش فاكرة ديه كانت لأنه منتج، العيب إننا فقدنا نوع كان مميز بينا وميزة تنافسية عالمية كانت عندنا، وبتخلى دول ثانية تحاول تعمل إعلانات عندنا أو تحتاج خدمات مواهبنا الإبداعية».

وتابع: «فى موسم كأس العالم ده، تقريبا كل إعلانات كأس العالم أغنية ونجم، باستثناء إعلان المرة ديه مكملين مثلا، وعلشان كده كل الناس قدرته، وفكرنى شخصيا بإعلانات الأفكار الحلوة بتاعة زمن الإعلانات الجميل، هل المشكلة فى المعلن اللى مش عايز يخاطر».

واستكمل: «ولا فى شركات دعاية استسهلت، ولا كوادر إبداعية ماعرفتش تعلم اللى بعدها وتخلق ليها خليف، ولا علشان فى كوادر عبقرية عملت أغانى خطيرة والنوع الثانى ماعرفش ينافس معاها، ولا جميع ما سبق».