مها الوكيل تكتب؛-من الآخر.. الحب مش بيروح، بس بيغيّر هدومه

يا ست الكل.. الحب عامل زي الشاي، يمشي مع أي سن، بس كل مرة بطعم مختلف.

في العشرينات
بتفتكري إن الحب يا حياة يا موت، وبتعيشي الدور بالأغاني والورد و"أهو ده اللي صار". وبعدين تكتشفي إن اللي كنتي بتموتي عشانه، عايش مبسوط، وبيأكل كباب وكفتة كأنك ما كنتيش موجودة أصلاً!

في التلاتينات
الحب بقى ينزل من برج إيفل على أقرب سوبرماركت. الرومانسية تبقى إنه يجيب معاكي نص المرتب، ويدفع فاتورة النت. وأعلى قمة رومانسية؟ إنه يدخل البيت شايل فراخ مخلية بدل وردة حمرا.

في الأربعينات
الحب يبقى عامل زي المطبخ بعد عزومة كبيرة… محتاج تنظيف وتنظيم. مش ناقصة دراما ولا أفلام هندية. عايزة راجل عاقل يسمعك ويضحك معاكي بدل ما يتخانق معاكي ع الريموت.

في الخمسينات
الحب يبقى "ورد بلدي" مش مستورد. بسيط وحلو، أهم كلمة تبقى "خلي بالك من نفسك". ورومانسية القمة لما يجيبلك شيكولاتة من غير ما تطلبي.

في الستينات والسبعينات
الحب يتحول لصداقة دافية. مش مهم كلمة "بحبك"، المهم فنجان شاي بالنعناع، وضحكة صافية، وحد يقولك "وحشتيني" من غير بهرجة.

في التمانينات
الحب يبقى فيلم كوميدي. "فين النضارة يا حاج؟" – "في إيدك يا ست الكل!". الضحكة في السن ده تساوي مليون "بحبك".

المشاكل بقى؟

دي ما بتتغيرش يا روحي.. بس بتغيّر شكلها:

في العشرين كنتي بتغاري من كل البنات.

في الخمسين؟ بتغاري من الموبايل اللي واخد وقته أكتر منك.

والاختفاء؟ تراث قديم من أيام أم كلثوم لحد دلوقتي.. الراجل يظهر فجأة زي إعلان على اليوتيوب، ويختفي أسرع من المرتب في أول أسبوع.

الخلاصة من الآخر:

الحب مش بيخلص.. هو زي الباتيه في الفرن:

في العشرين يولّع قلبك.

في الخمسين يدفّيه.

في التمانين يخليك تضحكي وإنتي بتدوّري على طقم السنان.

المهم.. نحب ونضحك ونفتكر إن الحب الكبير هو حبنا لنفسنا. والباقي؟ أي راجل ييجي بعد كده يبقى "بونس"، مش الأساس.