فادية عبد الغني: كنت نجمة من قبل ما زوجي ينتج لي.. لكن دلوقتي أي واحدة بتطلع بفلوس جوزها

تحدثت الفنانة فادية عبد الغني، عن مشوارها الفني، موضحة أنها لم تعتمد على أحد لتصل إلى مجدها، وأن زوجها السابق لم يكن سببًا في نجوميتها.

وقالت فادية عبد الغني، في تصريحات تليفزيونية: زوجي أنتج لي فيلم واحد اسمه إلحقونا، وده كان الفيلم الوحيد، وعملنا مسرحية تليفزيونية لم يتم إذاعتها ولا أتذكر اسمها حتى.

وتابعت: أنا وقت ما أنتج لي زوجي كنت بالفعل شغالة، ونجمي كان عالي أوي، فكان دي حاجة مش جديدة علشان حد يقول زوجها اللي خلاها نجمة، لكن اللي بنشوفه دلوقتي واحدة أو واحد أيًا كان، بيبقى اسمها مكتوب بالرصاص وبعدين بيتعملها بروباجاندا جامدة جدًا، بيبقى الناس هنا بتقول طب ما هي لسة مبقتش مُثقلة علشان تبقى في المكان ده، وبعدين الكلام بيكتر أن جوزها اللي عملها ده، لكن بالنسبة ليا أنا كنت نجمة من قبل ما ينتج لي زوجي.

أما عن حياتها الشخصية، فأوضحت الفنانة فادية عبد الغني، أنها تزوجت في سن 18 عاما، قائلة: إحنا عندنا سلو بلدنا كده، البنت توصل 18 سنة يقولوا هتعنس؟ لأ يلا على بيت جوزها على طول، والموضوع ده قل دلوقتي بسبب الحالة الاقتصادية.

وأضافت فادية عبد الغني: الجواز بدري ده مسئولية، لأنه بيخلي الإنسان يكبر بدري، ويعجز بدري، أو يتعب بدري، يا إما تكون الجوازة حلوة أوي فالحياة تكون لطيفة، لكن في العموم لازم البنت تتعلم كويس أوي، وتاخد تجربة في الحياة، علشان لما تيجي تختار الشخص يكون متوافق معاها متبقاش المسألة مجرد عريس وخلاص.