سماح أنور: سني لا يسمح بالحب.. وحبيت مرة واحدة وكانت تجربة مش لطيفة
كشفت الفنانة سماح أنور سبب ابتعادها عن الزواج والعلاقات العاطفية، مشيرة إلى أنها سعيدة في حياتها وهي وحيدة.
وقالت سماح أنور في تصريحات تليفزيونية: أنا مستمتعة لوحدي وأنا في سن مش بتاع حب، وبعدين لسه هقوم أحط ميكب وألبس وأنزل ونسهر ونرجع طب وشغلي وبكون عايزة أنام؟ وأنا من الناس الكسولة واتعودت على البيت ومش بحب أخرج إلا إذا كان عندي شغل.
وواصلت سماح أنور: اتعودت أبقى لوحدي وبقى دا نظام حياتي ودي جنتي والحياة المثالية ليا، ومفيش راجل فيها ومش بدور على الحب؛ لأنه عايز تفكير ولو حبيت هفكر هل بعد مرور 5 سنين هندم؟ هل هكون مبسوطة على المدى البعيد؟ والحياة العاطفية مش أولولية طول عمري لأني بقع في الحب وبتكون زي الحادثة.
وأضافت سماح أنور: عمري ما قولت عايزة أتجوز وبدور على حد، وممكن تحصل بدون ترتيب، وحبيت مرة واحدة في حياتي ومكنتش لطيفة والست لما بتحب بتقع على وشها ودا بيطفش الرجالة، وأنا مش بعرف أتقل وأتحكم وبقعد باصه للتليفون مستنياه يتصل بيا.. وبالتالي اقتنعت إني لا أصلح للعلاقات العاطفية.
ومن ناحية أخرى، تعيش سماح أنور حالة من النشاط على المستوى الفني حيث شاركت في مسلسل الليلة واللي فيها بالتعاون مع زينة ومطرب الراب أبيوسف، بجانب ظهورها كـ ضيفة شرف في مسلسل بدل الحدوتة تلاتة مع دنيا سمير غانم.
