إدوارد يحكي تجربته مع «حقن التخسيس»
أعلن الفنان إدوارد، منذ قليل، عن إصابته بشلل مؤقت في المعدة بسبب حقن التخسيس، وذلك عبر منشور كتبه بحسابه الرسمي بموقع التواصل الاجتماعي «فيس بوك».
وقال إدوارد: «أنا كنت باخد حقن التخسيس تحت إشراف دكتور تغذية ونزلت حوالي 15 كيلو، كنت باخد حقن الساكسندة، ودي الدكتورة نصحتني بيها بس مشكلتها بتتاخد كل يوم في المعدة، بس ميزتها أننا نقدر نتحكم في الجرعات عشان ما نتعبش، ووصلت للوزن اللي أنا عاوزه، ودخلنا في مرحلة التثبيت».
وأضاف :«الدكتورة طلبت مني أروح لدكتور جهاز هضمي أعمل تحاليل ونطمن.. بس أنا طنشت وقلت لها أنا هاخد حقن أسبوعية بدل اليومية عشان تعبت من كل يوم حقنة، وفيه ناس نصحوني بالتروليستك لأنها أسبوعية ومش قوية زي المونجارو، فضلت أخد التروليستك لمدة 5 أسابيع، كل أسبوع حقنة، وكانت تمام معايا وكانت برضه دكتورة التغذية بتسألني على التحاليل كل فترة وكنت بطنش لأني تمام مش حاسس بحاجة، وكمان لا كنت بتخن ولا بخس وباكل عادي طبعا برد».
وتابع :«مواظب على دايت مع الدكتورة لحد الأسبوع اللي فات فجأة مُش جعان خالص وقعدت حوالي 4 أيام مش بدخل حمام ولا قادر آكل، ووجع في معدتي جامد، دكتورة التغذية قالت لي وقَّف الحقن وروح لدكتور جهاز هضمي فورا، وعملت كدة رُحت لدكتور قالي حصلي شلل مؤقت من الحقن في المعدة، وكان مفروض تتابع معايا مع دكتورة التغذية قُلت له أنا اللي كنت بطنش عشان كنت تمام، قالي الحقن مش وحشة ومفعولها كويس، بس أنا بانصح أقصاها 3 شهور بس تاخدها وتوقف فترة وترجع تاني، بس لازم طبعا برده متابعة مع دكتور تغذية».
واختتم :««من غير ماطول عليكم أنا بقالي أسبوع بتعالج وعملت كل التحاليل حتى صبغة على الكلى، والحمد لله معنديش غير شوية زيادة في الأملاح زي كل المصريين بطني بتتحسن واحدة واحدة، ولسة المعدة وجعاني، والدكتور قالي من 8 ل 9 أيام ترجع عادي، وإن شاء الله هبقى كويس، أنا حكيت لكم تجربتي عشان بقول لكم إن الحقن مش وحشة وجابت نتيجة هايلة معايا بس لازم مع دكتور التغذية دكتور جهاز هضمي وكمان دكتور قلب لو أمكن عشان سرعة ضربات القلب، أتمنى أكون قدمت لكم معلومات كويسة عن تجربتي وربنا يشفي أي حد تعبان وأشوفكم دايما كويسين».
