من الورد الأحمر لطقم السنان … الحكاية كلها حب
« من الآخر.. » مع مها الوكيل ، كاتبة بتحب تحكي من القلب، وتقول اللي الناس بتحسه بس مش دايمًا بتعرف تعبر عنه.
يا ست الكل الحب ده زي الشاي بيمشي مع كل الأعمار وكل مرة بطعم مختلف في العشرين يا حبيبتي بتبقي فاكرة إن الحب ده حياة أو موت وبتكتشفي بعد ما تعيشي الدور بالأغاني والورد إن اللي كنتي بتموتي عشانه عايش مبسوط من غيرك وكمان بيأكل كباب وكفته عادي جدا.
يا ست الستات في التلاتينات بقى الحب بيتحول من قلبي وروحي لمرتب وقسط وشراكة في الفواتير أكبر رومانسية ممكن تشوفيها ساعتها إنه يدخل البيت شايل معاه فراخ مخلية بدل وردة حمرا.
يا حبيبتي في الأربعينات الحب بيبقى زي المطبخ بعد عزومة كبيرة محتاج ترتيب وتنضيف مش عايزة دراما ولا أفلام هندية عايزة راجل عاقل يقعد يسمعك ويضحك معاكي بدل ما يتخانق معاكي على الريموت.
يا ست الكل في الخمسينات بقى الحب بيبقى ورد بلدي مش مستورد بسيط كده ورائحته حلوة عايزة حد يقولك خلي بالك من نفسك ويجيبلك شيكولاتة من غير ما تطلبي.
يا روحي في الستينات والسبعينات الحب بيتحول لصداقة دافية مش مهم كلمة بحبك المهم فنجان شاي بالنعناع وضحكة من القلب وواحد يقولك وحشتيني من غير بهارات.
يا ست الستات في التمانينات الحب بيتحول لفيلم كوميدي فين النضارة يا حاج في إيدك يا ست الكل الضحك في السن ده بيساوي أكتر من مليون كلمة بحبك.
المشاكل بقى يا حبيبتي ماتتغيرش غير شكلها الغيرة مثلا في العشرين كنتي بتغاري من كل البنات وفي الخمسين بتغاري من الموبايل اللي واخد وقته أكتر منك والاختفاء ده موضة سارية من أيام جيل أم كلثوم لحد دلوقتي الراجل يطلعلك فجأة زي الإعلان ويدوب أسرع من المرتب في أول أسبوع.
من الآخر يا ست الستات الحب مش بيروح هو بيتقلب زي الباتيه في الفرن في العشرين يولع قلبك في الخمسين يدفّيه في التمانين يخليك تضحكي وإنتي بتدوري ع طقم السنان المهم نحب ونضحك ونفتكر إن الحب الكبير هو حبنا لنفسنا وأي راجل ييجي بعدها يبقى بونس مش الأساس.
