بعد دعم تركى آل الشيخ لـ نادر نور.. رامى صبرى يثير الجدل: الشعراء مبيعملوش حاجات مختلفة

رد الفنان رامى صبرى على الانتقادات التى وُجهت له، بعد انتقاده مستوى الأغنيات التى تُقدم له من الملحنين والشعراء المصريين، موضحًا أنهم لا يقدمون أغنيات جديدة ومختلفة.

وقال رامى صبرى فى فيديو له: «فيه ناس اتضايقت منى لما قولت إن الملحنين اللى بيبعتولى مبيعملوش حاجة مختلفة، أيوه دى حقيقة، مش مضطر أعمل حاجة عشان هى بتتبعتلى، أنا بعمل الحاجات اللى بشوفها من وجهة نظرى مختلفة وجديدة، دى حاجة متضايقش حد».

وأضاف: «المشكلة مش فى الشعراء والملحنين، كلهم كويسين، المشكلة إن المطربين مش كتير، فى السوق المصرية بالكتير إحنا 10، صعب تشتغل مع 10 مطربين وأنت عندك 70 ملحن وشاعر، وأشكر المستشار تركى آل الشيخ على الدعم اللى بيقدمه للفنانين».

كان المستشار تركى آل الشيخ قد أعلن دعمه للملحن نادر نور، بعدما خرج فى منشور له يعبر فيه عن أسفه، وعدم قدرته على التعاون مع شعراء جدد لأنه لايجد من يتعاون معه فنيًا.

وكشف الملحن نادر نور عن معاناته خلال الفترة الأخيرة، متحدثًا عن ابتعاده عن الساحة الغنائية والصعوبات التى واجهته فى محاولات العودة إلى الوسط الفنى خلال السنوات الماضية.

وكتب نادر عبر حسابه الرسمى على «فيسبوك»: «باعتذر لكل الناس اللى بتبعتلى كلمات أغانى من فضلكم متبعتوش تانى.. معنديش مشاريع شغال عليها ولا نجوم بتسمع منى أغانى ولا عندى حاجة أقدر أساعدك بيها لأنى ببساطة محتاج اللى يساعدنى».

وأضاف نادر نور: «وللناس اللى بتتهمنى بالكسل والتقصير أنا فعلًا بعدت فترة لأسباب شخصية وباحاول أرجع من 3 سنين ومش عارف.. مسيبتش باب مخبطتش عليه.. فقدت التواصل مع الأغلبية العظمى داخل الوسط الغنائى منهم نجوم اشتغلت ونجحت معاهم ومنهم اللى بحاول أشتغل معاه للمرة الأولى ومنهم اللى عِشرة عمر ومشوارنا بدأناه مع بعض وأحلام حلمناها ونجاحات حققناها سوا واللى بيرد على التليفون مرة مبيردش تانى، وبقيت أحس بالرفض وعدم التقبل، وأنا مش متعود أزن على حد أو أطلب الحاجة أكتر من مرة بشكل يقلل منى ومن احترامى لنفسى بعد كل اللى قدمته حتى لو كان قليل فهو كبير من وجهة نظرى».

واختتم: «أخيراً معنديش مشاكل مع حد ولا باكتب الكلام ده لكسب تعاطف حد، وكل الاحترام والتوفيق لزملائى، أنا مش زعلان من حد.. وآسف على الاطالة».

ليتفاعل على المنشور المستشار تركى آل الشيخ، رئيس هيئة الترفيه السعودية، عبر حسابه الرسمى على «فيسبوك» وكتب معلقًا: «انت فنان كبير وأنا حابب اشتغل معاك».

آخر حفلات رامى صبرى

وأحيا رامى صبرى، بداية الشهر الجارى، واحدة من أضخم حفلات الربيع داخل أحد النوادى الكبرى بالمعادى، وسط حضور جماهيرى كبير من الأسر والشباب، فى حفل رفع شعار «كامل العدد».

وشهد الحفل تفاعلًا واسعًا منذ اللحظات الأولى لصعود رامى صبرى إلى المسرح، حيث قدم باقة من أبرز أغانيه التى حققت نجاحًا كبيرًا خلال مشواره الفنى، ورددها معه الجمهور على مدار ما يقرب من ساعتين، من بينها «يمكن خير»، و«حياتى مش تمام»، و«بقابل ناس»، إلى جانب عدد من أغانى ألبومه الأخير «أنا بحبك إنت».