بيومي فؤاد: دائما كنت بحب من طرف واحد ومراتي زعلها وحش أوي

قال الفنان بيومى فؤاد، أنا كنت مستصغر نفسي على الجواز على طول وكنت بتكسف أقول لأي بنت أنى معجب بيكى، ولهذا السبب تزوجت على كبر، وكنت دائما بحب من طرف واحد.

وأضاف بيومى، خلال الجزء الثانى من حلوله ضيفا ببرنامج واحد من الناس مع الاعلامي عمرو الليثي على شاشة الحياة: أنا في حاجات كتير أخفيها عن مراتى منها أنى بشرب سجاير من وراها، ومن الحاجات اللى بخبيها عليها انى كل سنة كنت بوعدها أنى مش هعمل مسلسلات في رمضان، وأخفي عليها وبعدين بمضي شغل في رمضان، و زوجتى ما تعرفش أنا رايح فين وجاي منين، وأنا بطبعى لو حد كلمنى وقالى تعالى عاوزك ما اسئلوش عاوزنى ليه، وأمى هي اللى علمتنى اسبها علي الله وبلاش مقاطعة، لكنى لا يمكن أكذب، وعمر زوجتى ما اتجسست عليا، والحمد لله لم يتم كشفى في حاجة لحد دلوقتى لأن مراتى زعلها وحش أوى والحمد لله ما جربتش لحد دلوقتى.

وأضاف بيومى فؤاد، إن هناك معجبات كتير بى لأنى لطيف، والتقل عندى أنا مولود بيه طبيعى، و بكره الكلام في التليفون، ومعرفش اجيب دباديب، وأنا ومراتى عمرنا ما قولنا لبعض في عيد جوازنا كل سنة وأنتى طيبة، وفي أعياد الميلاد اهتمامنا أكتر بولادنا .

وتابع أنا دائما عندى حدود وبحب الست اللى بتعمل حدود، وسر السعادة الزوجية في اللى ينفع تطنشه طنشه علشان تبقى لطيف، وعلشان الحياة تستمر، وكمان علشان لما تقوملك قومه يعرفوا أنه لسبب كبير.