مصطفى شوبير: أنا مش بتاع قصف جبهات
تحدث مصطفى شوبير، حارس مرمى النادي الأهلي عن واقعة رفع لافتة التبديل الشهيرة على هامش مشاركة الفريق الأحمر في بطولة كأس العالم للأندية، خلال النسخة السابقة التي أقيمت في بداية العام بقطر، وانتهت بحصول القلعة الحمراء على المركز الثالث، والتتويج بالميدالية البرونزية على حساب نادي بالميراس البرازيلي بركلات الترجيح.
وقال مصطفى شوبير في تصريحات لبرنامج «الماتش»، الذي يقدمه الإعلامي هاني حتحوت عبر شاشة صدى البلد: «أنا مش بتاع قصف جبهات ومش بتأكل عيش».
وأضاف: «موضوع اللوحة بخصوص التبديل، دي كانت رقم 20 مش 27، ومكنش مقصود بيها يوم نهائي دوري أبطال أفريقيا زي ما اتقال».
وتابع: «ماخدتش بالي أن اللوحة معلقة ومكنتش أعرف أني بتصور أصلًا، وكنت بهزر مع وليد سليمان وسعد سمير وكانت قبل بداية المباراة».
وواصل: «لو قصفت جبهة وطلعت تريند أنا استفدت إيه؟ أنا مش ضامن بكرة فيه إيه، أنا مش هستفيد حاجة».
وكشف مصطفى شوبير حارس مرمى النادي الأهلي، عن كواليس حديثه مع أحد الإعلاميين من لاعبي الزمالك القدامى الذي اعتاد الهجوم عليه بضراوة.
وقال حارس مرمى القلعة الحمراء في تصريحاته التلفزيونية: «لاعب سابق في الزمالك كان بيهاجمني، وبعد مباراة كلمني قالي معلش أنا هاجمتك علشان عندي مشاكل مع والدك في الشغل».
وتابع: «بعدها هاجمني تاني وجه بعدها باركلي على الواتساب تاني، هو شخص متناقض مع نفسه جدًا، هرد عليه أقوله إيه؟».
وأتم: «هم بيحاولوا يهزوا علاقتي بوالدي وأنه هو السبب في الهجوم عليا، لكن هو شرف ليا وأني ابنه ده فخر ليا ومش مظلوم بسببه».
