خالد عليش يطالب بتعديل قانون الأحوال الشخصية: اتقوا الله في أطفالكم.. وحق الولاية لازم تكون مشتركة بين الأب والأم

طالب الفنان ومقدم البرامج خالد عليش، بتعديل قانون الأحوال الشخصية، مشيرًا إلى أن يكون هناك حق الولاية والحضانة على الأطفال مشتركة بين الأب والأم.

وكتب خالد عليش، منشورًا عبر حسابه الشخصي بموقع التواصل الاجتماعي فيسبوك، وقال: قانون الأحوال الشخصية محتاج تعديل يضمن حق الست والرجل وقبلهم الأطفال، لو عمل درامي ناقش حالة واحدة بظروف معينة، في حالات تانية كتير مظلومة ومتبهدلة سواء ستات أو رجالة، احنا زي ما بنتكلم على أب ظالم مبهدل عياله عشان يذل طليقته، في أم ظالمة بتبهدل عيالها عشان تذل طليقها اللي ساب جنتها وخلع ويتعاقب باقي حياته حتى لو هي اللي طالبة الطلاق.

وتابع عليش: حق الولاية والحضانة لازم تكون مشتركة بين الأب والأم، إزاي أب هيربي أولاده والقانون بيديله بس أنه يشوفهم كم ساعة في الأسبوع في مكان عام ومش من حقه ياخدهم ويخرجهم أو يسافر معاهم؟ إزاي الطفل أصلا هيبقي في علاقة طيبة بينه وبين والده وهو مش بيشوفه غير ساعتين في الأسبوع والأم طول الأسبوع بتسمعه كلام وحش بشكل مباشر أو غير مباشر عن باباه وجده وجدته.

منشور خالد عليش

واختتم: لازم الطفل يعيش مع باباه ومامته مشتركين لازم الطفل يسافر مع باباه ومامته وبتفسح معاهم هما الاتنين، لازم الأب يكون عنده الحق يدخل لابنه المدرسة ويتناقش مع المدرسين ويروح الطفل أوقات ويمارس دوره كأب مش يمنعوه من ده، اتقوا الله في اطفالكم واوعو تشجعوا أم مانعة الأب يشوف أولاده بحجة أنه هيخطفهم ولو عايز تشوفهم تعالى اقعد في بيت أهلى تتفرج عليهم من بعيد عشان متاخدش الطفل وتهرب أو استخدم حق الرؤية وشوف الطفل زي المسجون اللي مستني الزيارة.