« حديث الخميس » بقلم / مها الوكيل : هدنة مع العالم وضحكة من القلب

الخميس ده يوم عجيب... لا هو يوم شغل بجد، ولا هو إجازة بجد، ولا حتى عارفين نفرح بيه ولا نقلق من اللي بعده!

كل واحد فينا عنده حديث خاص بيوم الخميس؛ الموظف بيبص للساعة كل خمس دقايق، واللي عنده مشاوير بيحاول يخلصها قبل الزحمة، واللي مستني القبض بيحسبها بالدقيقة، واللي مستني مكالمة من حد عزيز عليه بيبص للموبايل كأنه مستني نتيجة الثانوية العامة!

أما أخبار الدنيا، فدي حكاية تانية خالص... كل يوم نصحى على خبر جديد، وننام على خبر أغرب منه. العالم بقى عامل زي مسلسل هندي حلقاته كتير، وأحداثه غريبه ومفيش حد فاهم مين بيحب مين ومين بيحارب مين!

والناس بقت محتاجة إجازة من الأخبارال تحرق الدم وإجازة من النكد، وإجازة من بعض البشر كمان!

الغريب إننا بقينا نعيش في زمن كل واحد فيه عنده رأي في كل حاجة، حتى لو ما يعرفش عنها حاجة. تلاقي واحد بيتكلم في السياسة، وبعدها الاقتصاد، وبعدها الطب، وبعدها الفضاء... ناقص بس يفتي في طريقة عمل الملوخية!

وعلى السوشيال ميديا، الكل سعيد، والكل ناجح، والكل مسافر، والكل بيحب حياته... إلا أنت قاعد بتدور على الريموت ومش لاقيه!

بس وسط كل ده، لازم نفتكر إن الحياة مش كلها أخبار ، ولا خناقات، ولا سباق مين عنده أكتر ومين وصل قبل مين.

الحياة محتاجة ضحكة من القلب، كلمة حلوة، قعدة مع ناس بنحبهم، وشوية راحة من دوشة العالم.

**من الآخر...**

خلي الخميس يوم مصالحة مع نفسك، سامح اللي يستاهل، وابعد عن اللي بيستهلك أعصابك، واقفل التليفون شوية... مش لازم نتابع كل مصيبة بتحصل في العالم، إحنا كفاية علينا مصايبنا الشخصية!

وابتسم... يمكن الدنيا تتعدل، ولو ما اتعدلتش، على الأقل نكون إحنا حافظنا على أعصابنا!
ومن الآخر، اقلكم سلام عليكم ونتقابل على خير الخميس القادم.