مها الوكيل تكتب «من الاخر »: هو إحنا بنجدّد القطارات ولا بنجدّد الحوادث؟!

من الآخر.. هو إحنا بنجدّد القطارات ولا بنجدّد الحوادث؟!

هو إيه الحكاية يا جماعة؟!

كل شوية نسمع عن حادث قطار، والناس تركب علشان توصل لأهلها وشغلها، وفجأة تلاقي نفسها في مواجهة كارثة!

آخرها حادث قطاري العياط، يوم 8 نوفمبر، لما قطار اصطدم بمؤخرة قطار تاني، وسقط 7 ضحايا وأُصيب 125 شخصًا، حسب البيانات المعلنة. ربنا يرحم الضحايا ويشفي المصابين ويصبر أهلهم.

بس فيه سؤال بقى محتاج إجابة، ومش عايزين إجابة من نوع: جاري التحقيق، وتم الدفع بالأوناش، وعادت حركة القطارات لطبيعتها!

هو مش إحنا صرفنا مليارات على تطوير السكك الحديدية وتجديد القطارات؟

طب فين نتيجة التطوير ده؟!

إحنا كنا فاكرين إن التجديد معناه أمان أكتر، وحوادث أقل، وراكب يركب القطر وهو مطمن، مش يركب وهو بيقول الشهادة قبل ما التذكرة تتخرم!

هو ممكن نكون جدّدنا شكل القطر ونسينا نجدد منظومة الأمان؟ ولا جدّدنا العربات وسبنا الإدارة والصيانة والرقابة محتاجة تجديد هي كمان؟!

طبعًا مش كل حادث سببه واحد، والتحقيق الفني هو اللي يحدد المسؤوليات، لكن تكرار الكوارث يفرض علينا نسأل ونحاسب، ومينفعش كل مرة نعتبر الحادث واقعة منفصلة ونقفل الصفحة لحد الحادث اللي بعده.

والأغرب إن المواطن بقى محتاج يطمن على سلامة القطر قبل ما يطمن على ميعاد وصوله!

يا جماعة، القطر مش لعبة قطارات كهربائية بنحركها على الترابيزة، دي أرواح بشر، وأب وأم وطفل وموظف وطالب، كل واحد فيهم له بيت مستنيه.

ومن حق الناس تسأل: مين المسؤول؟ ومين هيتحاسب؟ وهل منظومة الأمان بتشتغل بالكفاءة المطلوبة؟

وبصراحة، لازم تكون فيه محاسبة سياسية وإدارية حقيقية على أعلى مستوى، بما فيها مساءلة وزير النقل عن نتائج إدارة هذا الملف، وإذا أثبتت التحقيقات مسؤوليته أو تقصيره، فلازم تكون الاستقالة أو الإقالة مطروحة بجدية، مش مجرد كلام للاستهلاك الإعلامي.

إحنا مش ضد التطوير، بالعكس، إحنا عايزينه، بس التطوير الحقيقي مش صور قطارات جديدة ولا أرقام مليارات اتصرفت، التطوير الحقيقي إن الناس تركب وترجع بسلام.

من الآخر.. إحنا مش عايزين قطارات شكلها جديد، إحنا عايزين منظومة تحافظ على حياة اللي راكبينها.

كفاية بيانات نعي، وكفاية وعود، وكفاية ما بعد الحادث.

إحنا عايزين نسمع عن إجراءات تمنع الحادث اللي جاي، مش عن سيارات الإسعاف اللي وصلت بعد ما الكارثة حصلت!